احنا اللي بنتحسد
اكمننا ماخسرناش إنسانيتنا
احنا اللي بنتحسد على
جيوبنا المخرومة ومرمطتنا وصعلكتنا
احنا اللي بنتحسد على
إننا عرفنا هويتنا وعارفين لفين رايحة سكتنا
احنا اللي بنتحسد إننا
على إننا ما ضيعناش عمرنا نجري في كل اتجاه عشان كرسي وجاه
يخسَّرنا كرامتنا !!
************
احنا اللي كسبنا تجربة
عشرين سنة في سنتين
احنا اللي وشنا عمره
عشرين وقلبنا عمره خمسين
احنا اللي ودعنا اهلنا
وكتبنا وصيتنا قبل ما ننزل الميادين
احنا اللي لسه بنحلم وبنحلم
مع إن في نظر ناس كتير حوالينا حلمنا كفر بالملة والدين ..!!
************
احنا اللي الكاميرات
بتحبنا مع إننا ما بنحبهاش
احنا اللي مستنيين
نعيش لحظة واحدة صادقة في عمرنا كله تستاهل إنها تتعاش
احنا اللي رغم كل اللي
بنشوفه عندنا لسه القدرة على الاندهاش
احنا اللي بسبب ثباتنا
وقبضة إيدنا عالجمر بيبصوا لنا وباستغراب ويمكن بقرف
ويقولوا بلطجية وأوباش !!
************
احنا اللي بنتحسد على
الضحكة والحيوية
احنا اللي بنتحسد على البال
المرتاح وعيشة الحرية
احنا اللي بنتحسد إننا
نبان صغيرين و حلوين مع ان القلوب من جوه مكوية
احنا اللي بنتحسد على
إننا لسه بشر ماتحولناش من كتر اللي شفناه من ظلم وقهر
لمخلوقات من فصيلة
تانية !!
ليست هناك تعليقات:
إرسال تعليق