عاشقة الحرية

عاشقة الحرية

قرب واتفرج .. سيرك فلول الوطني

زعلانة قوي إن فاتني اصور لعب الفلول اللي عالمكشوف ، بجد مشاهد حية ومعبرة جدا عن الوطنية الخالصة . الواحد فعلا بيحس جنبهم إنه ولا حاجة .. الفرق الوحيد بينا وبينهم إنهم بيعرفوا يعبروا عن وطنيتهم بقوة اكتر مننا .. بالزعيق و التسقيف والتهليل .. تلاقي الواحد منهم عامل زي اللي عليه بيضة قايم قاعد .. ودايما متحفز وحاسس إن فيه ايادي خفية بتلعب في قفاه أو قفا الوطني اللي جنبه .. فاتلاقيهم مبتكرين جدا في مجال تكنولوجيا حماية القفا..

والله بنفسي لقيت كل واحد منهم دايما يبص وراه لو سمع دبانة معدية .. لو صوت خبطة خفيفة .. ماهم يا جماعة مستهدفين برضه وليهم حق يحافظوا على قفاهم بعد حكم المحكمة اللي صدر بحل حزبهم الغير مأسوف عليه .. الضربة كانت شديدة وهم مش واخدين على كده قفاهم مش واخد على الضرب ، هم واخدين بس على إنهم يضربوا على القفا وتحت الحزام . ويشوهوا سمعة اللي يتجرأ ويعارضهم .وطبعا هم أكيد أخذوا على إيدين حبايبهم ميليشيات أمن الدولة تدريبات مكثفة على كيفية حماية القفا في حالة اقتراب الخطر وعنوان الدورات دي " كيف تحمي قفاك من العيال المشاكسين والمعارضين اللي بيعضوا ايدين اسيادهم"..وضحكني جدا اسلوب السيد عبد المنعم عمارة في إن ثقافته انجليزي وعنده معاناة شديدة جداً في ترجمة كلمات مش عارف معناها بالعربي ياحرام!! فكرني جدا بالمرحوم أحمد شفيق بتاع الفورسيزون والبومبوني ، رغم إن فيه نسبة كبيرة من اللي قاعدين مش على نفس مستواه الفكري .بصراحة الموضوع ده خلاني أتعاطف معاه جدا .. مش خسارة الراجل يتعب نفسه ويقعد ساعة ونص بحالهم مع ناس معظمهم مش فاهمينه ومش قادرين يتواصلوا معاه ، يعني مضمون كلامه ماوصلش غير لنسبة 20% من الموجودين .. أنصحك يا دكتور عبد المنعم تاخذ آنتي ديبرسنت بعد ماتروح عشان تقدر تواصل مسار الحوار الوطني لدفع عجلة الإنتاج الرخمة اللي مش عايزة تتعتع من مطرحها ولا البنت العانس

نخش بقى في السيرك وفعالياته .. كان فيه واحد طول مانا باتفرج عليه ومش قادرة ابطل ضحك بجد الراجل ده موهوب ومجاله مش السياسة خالص حرام والله . أولا السؤال اللي انطرح عليه كان: احساسك بعد الثورة هل أنت متفائل أم متشائم ؟

الإجابة الرائعة من المواطن كانت: إيه بس يا جماعة ، مين جاب سيرة اخبار وحشة تشاؤم إيه وبتاع ايه ، العملية ماشية زي الفل وآخر حلاوة .. جرى إيه يا ثورة يا مضادة مالكم في ايه يا جدعان هو احنا كنا نحلم إننا نلاقي حسني مبارك بيتحاكم ؟؟؟؟

الكلام بتاعكوا ده خِطر قوي على مصر مش كده بالراحة علينا ..

بعد ما عمنا اللذيذ خلص جه وراه واحد أنقح منه أولاً هو مبتكر جدا وبرضه خهو خسارة في السياسة وقرفها .أخينا ده بعد ما وقف ورا المنصة ومسك المايك لف السلك على ذراعه ومسك طرف المايك التحتاني بين آخر صباعين (الخنصر والبنصر) في إيده في مشهد كان نفسي اصوره بجد لأن اي كاتب كوميدي كان لازم يحطه في فيلم من افلامه .. وغالباً والله أعلم هو كهربائي لأن في علاقة حميمية جدا بينه وبين الاسلاك بشكل عام (مع احترامنا للكهربائية المحترمين) وطبعا أكد في بداية حديثه وحلف بأغلظ الأيمان إنه من ائتلاف ثورة 25 يناير ، قلت بيني وبين نفسي بتحلف ليه يا اهبل ماهم كل اللي قاعدين ثوار زيك ومصدقينك ياخويا من غير ماتحلف (يابن الكذابة انت وهُمّه )، وتقريباً كرر كلام من نفس عينة زميله اللي سبقه

واحدة جت وراهم عاملة اسبانش شيك جدا وحلق تارة وريش تركواز في كم البلوزة السودا وحاجات كتير مشرشبة ، حاجة تري شيك ، وبجد دي قطعت قلبي البنت كانت ضمن ائتلاف ثورة 25 يناير زي زميلها اللي سبقها ، وكانوا في مقابلة مع المحافظ قبل السيرك (اقصد الصالون) والبنت ياعيني مصدومة من مستوى الناس اللي راحوا معاهم يقابلوا المحافظ ، قال: لقينا ناس غريبة قوي دخلت معانا عند المحافظ واتهجموا علينا وشتمونا وكانوا حايضربونا .مادوناش فرصة إننا نعرض مطالبنا عليه ، وانا مش فاهمة ازاي المندسين دول دخلوا بينا ، وازاي يتعرضولنا بالشكل ده (وشوية شوية كانت حاتقول هم مايعرفوش إننا حزب وطني ولا إيه وإن فلول أمن الدولة بتدعمنا في شغل البلطجة والثلاث ورقات، غالباً هي نسيت إن الحزب اللي هي منه لسه محلول بقاله فترة قصيرة ) بصراحة انا بعد ما الصالون اتقفل كنت عايزة احييها على الشياكة وحسن اختيار الجمل والتعابير القوية الرنانة

طبعاً كان العرض غني ومتنوع مابين عروض الطواويس مكسورة الانف وطبعا شجعان السيما اللي ضاربين البانك والصبغة ومسبلين عينيهم ، قرود الجبلايات ،مطربين الموالد ، المنولوجستات اللي خلوني اقول بيني وبين نفسي الله يرحمك يا سمعة انت وشكوكو

وكل سيرك وانتم طيبين