مكتسبات الثورة

• إن ماما بطلت تهزأني بعد اطفش اي عريس

(وحشني جدا تهزيء ماما ليا بعد الموقف ما يعدي والعريس يروح ولا يرجعش تاني ..

• كنت دايماً قبل الثورة باردد مثل " اللي يخاف من الوطني يطلع له ولو حتى في صورة عريس !!!فعلا من علامات النحس الدكر اللي كان صايبني إن معظم العرسان اللي كانوا بيحطوا عندي منتمين للحزب الوطني ، حتى واحد منهم كان بيدير الحملة الانتخابية لمحمود عثمان في الإسماعيلية .. دلوقتي الحمد لله ربنا كسفهم وماعادش حد فيهم جاي له نفس لا يتجوز ولا حتى يعاكس ! :)
• إني الحمد لله بطلت أخاف ، باعبر عن رأيي بحرية ومن غير ما اسيء للي قدامي ..
• تطبيقا لشعار ارفع راسك فوق انت مصري .. دايماً بقيت وانا ماشية لوحدي أقول : أنا مش قصيرة وقزعة انا طويلة وقمر وأجنن ويخربيت جمالي (وجمال مبارك ياللا بالمرة)
• قبل الثورة كنت بعاني من كوابيس .. دلوقتي عندي أحلام كتير قوي والمشكلة مش عارفة أبدأ منين ..
• بطلت آخذ مهدئات
• باحمد ربنا كل يوم ألف مرة على إني ماستفدتش من النظام السابق .. حتى التعليم الأساسي - اللي بيعايروا التلاميذ بيه ورغم إنهم غيبوا بيه وعيهم وجاروا بيه على مواهبهم وقدراتهم - اتعلمته برا مصر .. ونفسي وبادعي ربنا إن كل الأطفال المصريين يتعلموا نفس التعليم اللي اتعلمته وانا صغيرة .. التعليم اللي هدفه بناء الإنسان وتنمية مهاراته ..
• اصبحت أكثر تفاؤلاً رغم إن لسه الصورة فيها شوية ضباب ، بس من وراه شمس منورة وساطعة .. وأكيد عندي أمل في بكره أحلى مش بس ليا لكل المصريين .
• عرفت من معاملة الشرطة ، ومن سواق الاوتوبيس وسواق التاكسي والعمال الغلابة إن المصريين من أفضل الشعوب في العالم .. عرفت معنى المواطنة .. عرفت إن كلنا ماكناش حاسين بآدميتنا ولا بقيمتنا كمواطنين .. دلوقتي عرفنا احنا مين ، عرفنا إننا نستحق الافضل .. عرفنا وتأكدنا إننا ماكناش عايشين .. ودلوقتي بنعيش وبنبني بلدنا وبنعمرها كل واحد في مجاله .. بروح إيجابية وحب وإخلاص لبلدنا
• وأخيرا كل ما نحقق إنجاز واجب علينا نفتكر الشهداء والمصابين اللي قدموا أرواحهم عشان نعيش حياة أفضل .. ربنا يصبر أهاليهم ويلحقنا بيهم في الجنة ..

حكموا ضمائركم

ارجوكم يا شباب وأخواني الأعزاء .. اسمعوا لصوت العقل ..ياريت ما حدش ينسى إن البرادعي من أوائل من نادوا بالتغيير .. والنظام السابق حاربه بشراسة ومن حقارة شلة مبارك إنهم شوهوا سمعة بنته بالباطل زي ما فضحوا مبارك بالصور التعبيرية ،، يظهر إنهم كانوا زي العيل اللي فرحان ببرنامج فوتوشوب وعمال يلعب ويجرب .. فهو اللي اتفضح .. وفي الآخر ادعوا ربنا اننا نحافظ على وحدتنا ويولي علينا الصالح أيا كان .. ممكن تدعوا بدل ما نقعد نشكك..

وماتنسوش إن الحديث سابق لأوانه . وإن من مصلحة الفلول إنها تبعترنا وتفرقنا لازم نتحداهم .. ونثبت إننا اهل للديموقراطية و‘إن من حقنا نجري ورا حلمنا بمصر جديدة أجمل بينا وبجهودنا وعرقنا وإخلاصنا ..

استشهد هنا بجزء من مقالة لد.محمد المخزنجي .. الذي يعتبر من الشخصيات النزيهة والمحبة بل والعاشقة لمصر :

"قلت إننى لطالما تمنيت أن يكون فى سدة الحكم رجال كالدكتور البرادعى أو الدكتور محمد غنيم أو غيرهم من المصريين الأفاضل ذوى المصداقية الواضحة والصلابة الأخلاقية والإيمان برفعة القانون وبهاء العدالة والعدل. أناس هم طلاب حق لا سُلطة، إلا لو دعاهم إليها داعى أداء الواجب، كونها تكليفا لا تشريفا، ومغرما يستحق التضحية لا مغنما يدعو إلى المزاحمة. باختصار نحن فى هذه المرحلة المتوترة والمضطربة أشد ما نكون حاجة للرجال الضمائر، والدكتور البرادعى نموذج لهم، وينبغى الآن أن يظل كذلك، لهذا رجوته ألا "

يستجيب الآن لدعوة الداعين إلى إعلانه نيته الترشح للرئاسة.

تعقيب صغير جدا على ما قاله د.المخزنجي "أريد رئيساً مواطنا عادياً .. كفايانا كاريزمات .. وزعامة فشينك"

حكموا العقل أرجوكم ولا تتسرعوا في الحكم على شخص أيا كان ..

مصر بحاجة لوعينا وثقافتنا ويقظتنا

كلمة أخيرة للشباب

حكموا ضمائركم ..

وحافظوا على ثورتكم

إحساس طبيعي بالقرف

إحساس طبيعي بالقرف

أصدقائي الأعزاء .. من حقكم تسألوا ليه حاسة بالقرف الشديد ..

تخيلوا نفسكم مكاني وعيشوا معايا هذه الأجواء ، اللي بيسموها الثورة المضادة .. وياريت اللي عنده اقتراح مناسب يتقدم لي بيه فوراً ومن غير تردد .. أرجوكم ساعدوني لأني لأول مرة في حياتي أعيش يوم غريب زي كده .. لسه مانتهاش وبادعي ربنا من قلبي إنه يعدي على خير ..

تخيل نفسك بتشتغل في جامعة .. المفروض إن الجامعة مكان للعلم ولنشر القيم الإنسانية السامية والنبيلة .. وتتفاجيء - طبعا انا اكتشفت إني الحمد لله رغم إني باشتغل في الجو الموبوء ده بقالي 10 سنين تقريباً إلا أني لسه بريئة وساذجة الحمد لله :)- إن رئيسها اللي بدرجة أستاذ دكتور وقاعد مرزي على قلبنا بقاله 5 أو 6 سنين مشغل تحت إيديه من شلة منتفعينه وقرايبه قوادين وإيه معينهم في أحسن أماكن (منهم مثلاً مركز اسمه تطوير التعليم الجامعي ) رغم إني متأكدة 100% إن مؤهلاتهم معدومة ومشهود لهم من الكل بإنهم جهلة وأغبياء بجدارة ، ده غير طبعاً إنهم لزجين وسخفاء ولما تيجي تتعامل معاهم - وبالذات لو انت ربنا مبتليك بإنك أنثى مش ذكر وبالذات لو مش محجبة - تبقى حاسس إنك خلاص حاترجع من كتر السماجة والتلزيق .. ده غير الابتزاز المفضوح والضغط عليك بإن مافيش مصلحة ممكن تتقضي ليك إلا لو استسلمت لرغباتهم الحقيرة .. لو بنت مافيش قدامك غير إنك تعصري كام لمونة عشان المصلحة - اللي هي المفروض حقك الطبيعي - تمشي وتتقضى (لأنه ضعيف قدام الجنس اللطيف )

ولو راجل مافيش قدامك غير الرشوة والسجاير .. وإنهم ينتهكوا آدميتك عشان يحولوك لعبد ليهم .

تخيلوا بقى دول رد فعلهم حايكون إيه في الظروف اللي بنعيشها دلوقتي ، والثورة اللي زلزلت الأرض تحت رجليهم ، مع العلم إنها مهزوزة من الأول لأنهم لو عندهم ذرة فهم وإحساس ودم كانوا عرفوا إن الحزب الوطني زي ما إداهم (هو وريسه ووالي الحسبة المحبوس حالياً أحمد عز ) صابونة كبيرة جداً واستخسر فيهم مقعد البرلمان في المجلس الفاشل المنحل ووقتها اللي كسب ضابط شرطة برتبة لواء بحكم إن الرشوة والنفوذ هما سيدا الموقف قبل 25 يناير كان برضه حايديهم صابونة تاني وتالت وعمره ما كان حايديهم اللي هم بيحلموا يكسبوه على قفانا احنا الموظفين الغلابة ولاد البطة السودا ،، رغم إن جيلي والجيل الأصغر مني هم اللي بيشتغلوا بجد وبيرضوا ضميرهم من غير ما يكون العائد المادي يكفل لنا الستر والرضا اللي نستحقه ، يعني بيمصوا دمنا و ننطحن في الشغل ومرتبنا الحمد لله مش كبير وراضيين وكمان هم شايفين إن ليهم السيادة علينا لمجرد انتماءهم للحزب الفاشل (الوطني ) وبيفردوا سلطتهم علينا من غير اي اعتبار لأننا بني آدمين نستحق إن ماكانش تقدير مادي فعلى الأقل التقدير المعنوي .. مش مصدقة إنهم للدرجة دي عديمي الكرامة والإنسانية !!!

وانا باتشرف إني من الموظفين الغلابة محدودي الدخل الغير مرضي عنهم من الحزب إياه ، وباحمد ربنا جدا إن ربنا نورلي بصيرتي وماخلانيش أقبل على نفسي إني أكون ضمن فلول الحزب الوطني .. رغم إن مندوبين الحزب الواطي ده كان بيتحايل علي أنا وغيري عشان نطاطي ليهم وندخل في زمرتهم وناخد عضويته اللي الكل بيتبرى منها دلوقتي ..

كانوا بيتهمونا إننا شباب بلا طموح .. وماعندناش انتماء ، وطايشين

ييجوا بقى الإخوة الأفاضل اللي بيتهمونا واللي هم نفسهم من أصحاب مبدأ الولاء للشخص - مهما كان الشخص ده خاين لبلده وفاسد - دلوقتي يتفرجوا علينا واحنا بتخرج لنا تعليمات وتنبيهات بعدم التصريح بتضامنا مع الثورة عشان خاطر مشاعر الدكتور المحترم - الطاهر النظيف- ماتتجرحش ونكون بنقف ضد مصلحته وضد ترقيه لمنصب وزير ، هي الناس دي ليه مصرة تعيش في غيبوبة ؟؟ ده حتى التليفزيون المصري والجرايد القومية بدأت تغير مسلكها .. ( وبالمناسبة حسسوني إنهم كانوا مساجين قلعة إعلام صفوت والفقي وبعد ما ربنا كرمهم وخرجوا من السجن قرروا يسلكوا سلوك حسن يمكن ربنا يتوب عليهم ) ودول سبحان الله بصراحة فيهم ميزة برضه وهي إنهم ماتحولوش ولسه بيشككوا إن فيه ثورة وإن مبارك حايرجع يحكم تاني ، والحقيقة إن اللي هم بيعملوه ده في مصلحتنا .. مادمتم مصرين على مبدأكم ومصرين تراعوا مصلحة رئيس الجامعة والمحافظ ومدير الأمن حتى ، فا يالا حلال عليكم ، وأقل عقوبة هي فعلاً إنكم تتمنعوا من المشاركة السياسية لفترة ماتقلش عن 5 سنين ( أقل واجب) لحد ما الدورة البرلمانية الجاية تعدي على خير ويتغير المحافظ مرتين ..

(ياللا عشان ماتلاقوش حد تنافقوه يمكن تنسوا عادة النفاق السيئة اللي تغلغلت جواكم وبقت زي التدخين الإقلاع عنه مؤلم وبيوجع جدا جدا ..

بس معلهش أهو اتهام باتهام مش انتوا بتقولوا علينا طايشين احنا بقى شايفين إنكم خطر على مصر ولازم وأقل واجب تيجيوا على نفسكم خمس سنين يبقى مالكوش فيها وجود في الساحة السياسية لغاية ما نعدي المرحلة دي بنظافة ومن غير ما تجيبولنا حسني مبارك تاني ..

وتفضلوا تغتالونا كل الباقي من عمرنا زي ما اتعودتوا طول السنين اللي فاتت ..

لأ وبجد ضحكتوني جداً لما زعلتم من كلمة فلول ..وحاسين إنها شتيمة وقبيحة كمان ، فعلاً اللي على راسه بطحة الوطني يحسس عليها لمدة 5 سنين قدام ..

بجد بادعي ربنا إن الناس دي تبطل تنشر ثقافتها الفاشلة وتسكت وتهدأ شوية، بجد كفايانا جهل وقبح كانوا بيقولوا إننا بنشر آراءنا ومطالبنا بالحرية والديموقراطية بنشوه سمعة مصر ( والله برضه لينا الشرف إن كان تشويه سمعة الحزب الوطني في نظركم هو تشويه لسمعة مصر).

حرام عليكوا بجد بدل مانتم فاضيين وعمال تنصحونا بإننا مانتضامنش مع الثورة عشان الاستقرار ، ماتشتغلوا انتوا وورونا شطارتكم ، على الأقل ساعدونا بدل مانتم سايقين في النطاعة عالآخر كده .. ومابتبطلوش طول اليوم مشاكل ونكد وطبطبة على سيادة الريس ،،وتخويف فينا وتهديد لينا بإن جواسيسه منتشرة و مطلوقة علينا ، وفروا مجهودكم في الطبطبة والمحلسة لواحد أيامه بقت معدودة في مكانه واشتغلوا وانتجوا ، مش بتقولوا إننا وقفنا عجلة الإنتاج بتظاهرات يوم الجمعة ، زقوها انتم واحنا نزق معاكم .. لأنه والله لا هو ولا غيره حاينفعوكم ، خللوا عندكم ريحة الدم وبدل ماتتنحرروا علينا افتكروا إنكم مصريين ، افتركوا إنكم مواطنين ليكم حقوق وعليكم واجبات وبدل ما تنصحونا إننا بس اللي نشتغل زي تيران السواقي وانتم قاعدين تتفرجوا ساعدونا يساعدكم ربنا يمكن ربنا ساعتها يشفي عنكم أمراض الكسل والرخامة والمريسة عالفاضي ..

والله احنا ماحناش وحشين ولا غاويين نعطل عجلة الإنتاج ، وعربة الاقتصاد وحمار الشغل .. لكن ورونا الشطارة والهمة على الأقل ما نحسش اننا لوحدنا اللي نفسنا مقطوع طول الاسبوع .. مش يمكن لما تراجعوا نفسكم تشوفوا بلدكم بطريقة مختلفة ، وساعتها تحسوا ببركة في الرزق وشفاء من العلل والأمراض اللي سكنت جواكم من كتر مخالفة الضمير واسترضاء الرؤساء وركوب كل موجة على حسابنا ..

أرجوكم أعيدوا النظر في حياتكم ، افتكروا إن مصر مش عزبة دي بلد ..

البلد مش رئيس أيا كان - أحسن تقولوا إننا شمتانين في حسني مبارك ولا حاجة أو بنحقد عليه اكمن هو مليارات وقصور كتير واحنا ماعندناش غير الستر الحمد لله- البلد يعني أرض وشعب ، تاريخ وحضارة ، والشعب يختار حكومة ورئيس يحكمه بما يرضي ربنا

والشعب من حقه يختار الحاكم ومن حقه كمان إنه يسقطه وقت ما يلاقيه قاعد مالوش لازمة .. ومابيعملش إنجازات ترضيه على أرض الواقع .. وزي ما سنة ربنا في الكون هي التغيير .. فسنة الحياة التغيير ، مافيش حاجة دايمة غير وجه ربنا الكريم ..

تخيلوا نفسكم ليكم ابن استشهد أو اصيب .. أرجوكم حكموا ضمايركم ..

وإذا كنتم فعلا مع الاستقرار ساعدونا .. ما تصدقوش الوهم اللي بيقول إن حكم مبارك أحسن .. لو كان مبارك حقق الاستقرار لكل المصريين بالمعنى الحقيقي ليه ماكناش بقينا في حاجة لثورة ..

حكموا ضمايركم أرجوكم .. ولنا الله ..

برضه مصرة على طلبي منكم ومشورتكم يا أصدقائي الاعزاء ..

التطهير قبل البناء

لا يوجد مرحلة انتقالية في اي ثورة في العالم إلا ومرت بمطبات و شابها القلق لعدة عوامل ، ولاجتياز هذه المرحلة والعبور بمصر إلى بر الأمان من حقنا أن يطمئننا الجيش بأن مستقبل بلدنا له الأولوية القصوى ، ومن الطبيعي لأي بناء كي يتم ويعيش لسنوات 'طويلة وتتمتع به الأجيال القادمة أن توضع له اساسات قوية ومتينة حتى لا يتهاوى ، لذا فلا بد ان توضع الأساسات على أرض صالحة ودون شوائب .. بالبلدي مفيش نجاح لأي بناء إلا بالتخلص من الفساد وتطهير الأرض. فهتمنا يا جيش ؟ ..