طول الأيام اللي فاتت كنت حاسة إني متغاظة بشكل غير عادي ، لو يحكموني على حد من أمن الدولة أو ذيول الوطني بتهيألي إني حاكله باسناني ، أول مرة في حياتي بجد أحس بكمية الغل والكره ناحية حزب أو اشخاص بالشكل ده .. لو حكيت ليكو خبراتي المهببة مع الحزب ده لمدة عشر سنين فاتت حاتعذروني ..
في الحقيقة زي مانا متغاظة منهم أنا واجب أشكرهم ، كرهي ليهم طول السنين والعقد اللي ربوها جوايا خلتني بقيت شخصية مختلفة خالص عن زمان ، حاتسألوا إزاي ؟
كنت زمان باشيل غيظي واكتمه جوايا عشان اتربينا غلط على إن الواحد لو حد اكبر منه غلط فيه مايردش ! اتضح ان الكلام مالوش لا اساس ديني ولا أخلاقي ، معلهش ماتآخذونيش في التشبيه هم مش وقت ما ربونا على كده ، في نفس الوقت ربونا على إن لو حد كبير حاول يلمس واحدة مننا بطريقة مريبة لازم تزعق وتلم الناس عليه عشان تحمي نفسها ، بلاش التشبيه ده .. إفرض حد كبير برضه سرقني أو ابتزني عشان ياخد مني فلوس مثلاً ، اسكت له إزاي و ليه ، هو كاسر عيني بإيه ..
أصبحت بمرور الوقت اتمرد على المثالية الغلط اللي شربوهالي اهلي في الببرونة من وانا عيلة في اللفة .. صحيح المفروض إني أكون مؤدبة و مثالية لكن مع اللي يعاملني بمثالية مش يعاملني باحتقار ويستغباني .. حتى لو اثبتّ له إني مش غبية يصر على اسلوبه البايخ والسخيف واللي فيه استخفاف بعقلي !
ما مابالكم بقى بحزب بحاله يصر لغاية اللحظة دي إنه يتعامل مع بلد بحالها ومع شعبها بمنطق الوصاية ، بحجة إنه عارف مصلحتها أكتر ، وإن هو الحزب الوحيد الموجود في الساحة وعنده باع طويل جداً في السياسة ، سؤال : إذا كان شباب مصر في نسبة كبيرة منهم ماعندهاش النضج أو الوعي السياسي الكافي ، فيا ريت حد يجاوبني ، مين السبب في تغييب الوعي ؟ ومين اللي شوه المناهج الدراسية اللي اختزلت تاريخ مصر وبالذات انتصارات أكتوبر في الضربة الجوية للطيار حسني مبارك ؟ وليه في المقابل فيه إصرار على تجاهل بطولات أبناء السويس بعد الثغرة والعمليات الفدائية وتصديهم للاسرائيليين ؟ بعد 67 مين اللي حارب في شمال سيناء وساعد الجيش والمخابرات في حرب الاستنزاف والعمليات الفدائية اللي خلت جيش إسرائيل يلف حوالين نفسه ؟ مين اللي اعتقلوا في سجون إسرائيل بالسنين واتعذبوا وداقوا المر لاجل ما يقروا بأسماء ضباط المخابرات الحربية اللي بينفذوا هذه العمليات ، واستحملوا كل ده وماحدش نطق باسم واحد من الضباط ؟ مين اللي ضحى كل التضحيات دي وبالتالي عمل تمهيد لنصر أكتوبر ؟
والله لو حسني مبارك لوحده كان هو أنجز البطولات دي ، كان يستحق مننا نرفع له الشابوه !!! لكن إزاي هو لوحده يقوم بكل ده ؟ ولما اصبح رئيس فشل في إنه ينقل مصر النقلة الحضارية اللي تستحقها !!
ولما هو بطل الأبطال ليه استعان ببطانة فاسدة رفعوه لمرتبة الإله وهو عارف إنهم بيعملوا كده مش تقديراً لبطولاته ، لكن بعلمه ومعرفته كانوا إنهم بيشتغلوا لمصلحتهم الشخصية ،سقعوا الأراضي الزراعية لمصلحتهم وبنوا عليها المنتجعات ، وبينهبوا ضرايبنا سنين ويقلبوها في جيوبهم وآخرهم الوزير المشهور بالنسر الخطاف اللي أخذ فلوس التأمينات وضارب بيها في البورصة لحسابه وكان من أوائل اللي هربوا على لبنان ؟ ولو هو عنده ذرة محاسبة لنفسه وعارف إنه بشر وبيخطأ يقبل الفكرة اللي زرعوها حاشيته الفاسدة في دماغه بإن كل اللي بيقوله صواب وغير قابل للمناقشة. وازاي واحد حارب وكان مستعد يفدي بلده بروحه - لو فرضنا انه فعلاً عمل كده- يقبل ويقتنع بفكرة أنه هو وعيلته فوق الحساب.
أظن ليا حق أتفرس من اللي لسه بيدافعوا عنه بمنطق العبودية المريض _ واللي باتمنالهم ربنا يشفيهم من متلازمة ستوكهولم ومباركو فوبيا - بعد كل التناقضات اللي سردتها ، وكلها كوم وموضوع وفاة حفيده كوم تاني ، واللي قعدوا يزايدوا بيه على إن من حقه يستمر الست شهور الباقيين ليه في الحكم لأنه كده كده زهد وتعب ومش راغب في السلطة!!
بصراحة غصب عني كان اللي بيدافع عنه أو عن الحزب الوطني ويشكك في إن فيه شهداء سقطوا في الثورة كنت باشوطه ، ورغم إني ما أخطأتش في حد منهم باللفظ أو تخطيت حدودي وماستعملتش نفس اساليبهم ، إلا إني برضه استغلطت نفسي ، لقيت نفسي ريقي بينشف وصوتي اتبحّ وبرضه من غير فايدة ؟ واتوصلت في الآخر لجملة ريحتني أي حد بيستفزني بقيت ارد بيها عليه وهي: إذا مصر - إن شاء الله وصلت لبر الأمان ونظفت من كل الفاسدين واصبحت دولة مدنية متقدمة في المجالات - ماعجبتكوش سيبوها وشوفولكم بلد تانية يكونوا استنسخوا فيها بطل مجاهد في سبيل الله اسمه محمد حسني مبارك و حزب وطني بيحكم البلد بقاله 50 سنة..!!
والفكرة اللي عايزة أوصللها ونفسي كل المصريين يوصلولها معايا ، إن دورنا دلوقتي هو توحيد صفنا ، لاحظوا إن الموضوع مش سهل بالنسبة لذيول الوطني إنهم يتخلوا عن سياسة النهب والسرقة اللي بيمارسوها من 30 سنة ، وأنا النهاردة رغم غيظي منهم لكن احترمت حسن تخطيطهم لكل الأحداث اللي حصلت طول اليومين ولسه بتحصل ، ومستغربة اقتناعهم بالأفكار الغلط والتمسك بيها لحد آخر نفس !!!
إذا كانوا هم متمسكين بأفكارهم الغلط ، ليه احنا مانتمسكش بإفكارنا الصح ؟ وإذا كانوا بيدافعوا باستماتة لحد آخر نفس عن مصالحهم وبيحاولوا يكونوا سابقينا بخطوة او خطوتين ، ليه احنا كمان مانخدش حذرنا ونتصدى ليهم بالإصرار على حقوقنا السياسية المشروعة ، ونوحد صفوفنا في كل محافظات مصر ونضغط بالطرق السلمية والتفاوض والحوار الراقي للحصول على حقنا بتكوين حزب قوي . و نحاول -
على قد ما نقدر- نثقف
نفسنا سياسياً على قد ما نقدر لأن الوقت مش في صالحنا ، وللأسف هم مازالوا منظمين أكتر مننا بكتير هم والإخوان المسلمين .
الحمد لله بدأت أغير منهجي في الحوار النهاردة ، اللي حصل إمبارح فوقني ، قلت إذا حد جادلني منهم ممكن أغلبه وبسهولة ومن غير اي جعجعة بالحوار الهادي والحجة القوية .. ماتنسوش إننا على حق والضعيف بس هو اللي بيعمل شبورة دايماً يغلوش بيها على أخطاؤه .إذا كانت لينا أخطاءنا ياريت نلحق نصلحها وبسرعة ومانمشيش ورا أي إشاعة أو خبر إلا لما نتأكد منه الأول ، عشان ماندفعش الثمن اللي دفعوه ولسه حايدفعوه .
ليست هناك تعليقات:
إرسال تعليق