امسك عريس

عريس يابوووووي

ا ريت ماتفهمونيش غلط وتقولوا دي عقد عوانس ، صدقوني الحاجات دي بتحصل كل يوم مع بنات كتيير الفرق بيني وبينهم اني أكثر جرأة بس و الله انا نيتي حلوة مش اكتر من تنبيه : خلوا بالكوا يا بنات من النوع ده من الشباب
في أول لقاء جمعني بيه في تعارف تقليدي جداً بصلي بخبث وقال: انا شفتك قبل كده .رديت بمنتهى البراءة :مش فاكرة بجد امتى وفين فكرني ، مش انتِ اللي كان شعرك اسود وناعم وطويل وكنت بتسافري على طول للجامعة أظن كنتي في جامعة القاهرة . برافو عليك ( وبيني وبين نفسي قلت يابن الناصحة دا انت مراقبني( ماخبيش عليكو الكلام دا أرضى غروري وقلت بس دا مهتم بيا و اكيد الصنارة غمزت ، والمصيبة ان اللي حواليا افتكروا كده برضه
عدا يوم وشهر وسنة واتنين و العريس فص ملح وداب ولما حد نكشه عن الموضوع رد الذكي وقال: انا مش قد البنت دي ومستوى عيلتها ، يا سيدي كتر خيرك وكل شيء نصيب ، لكن الغريب أنه بعد 3 سنين طلب انه يشوفني تاني وقال اني من أحسن البنات اللي عرفهم في حياته_ يا سيدي شكراً _ أخجلت تواضعي عالآخر ، ويظهر اني كنت صعبانة عليه يعني بنت داخلة على الثلاثين وماحدش معبرها يبقى هو أولى بالثواب و اهو جبر الخواطر على الله ،و في المقابلة التانية لقيته زي ماهو نفسااللون الجميل والقامة الساحرة _الحال من بعضه احنا الاتنين أقزام لا تعايرني ولا اعايرك_ وكان اللقاء في السينما (تيموروشفيقة وفي الجزء التاني من الفيلم طلب يقعد جنبي ، ياحبيبي! وماله و لأنه شاب بيخر رومانسية قعد يهمس بكلام ماسمعتوش لأني _ كنت مركزة في الفيلم اوي هو حد يسيب احمد السقا و يبص لحد تاني_ المهم لقى الكلام مافيش فايدة منه حاول يمسك ايدي و من هنا كانت النهاية لقصة لسه مابدأتش بعدت عنه وقلت له لو سمحت عايزة اتفرج و مش وقته خالص ، انا كده غلطانة و بعدين احنا لسه يادوب بنتعرف ، بس يظهر اني بكده جرحت مشاعره وحسيت انه اتكبس وكان شوية شوية حايعيط !!!يظهر انه تخيل لوهلة انه أحمد السقا واللي جنبه منى زكي ، مع احترامي للاتنين!
مافيش داعي اكمل لأن اكيد عرفتوا النهاية طبعا اشتكاني لمعارفنا و حكى اللي حصل مع بعض التحوير و كان مستغرب اني اتعامل معاه كده مع ان فيه بنات كتير كل يوم بينتحروا عشان اتمنوا منه مجرد نظرة ويا حرام مطالوهاش ، هو انا اي حد دا انا مهندس محترم والعمال بيترعبوا مني في المواقع _ يظهر انه استغرب ازاي انا ماترعبتش _ و لأني بطبعي متفائلة قلت لنفسي خيرها في غيرها
ودي كانت صفحة من مذكراتي التي تحمل عنوان مذكرات عانس
باي باي